Напярэдаднi Дня Перамогi, калi да слаўнага 80-годдзя застаюцца лiчаныя гадзiны, хвiлiны, iмгненнi, выхаванцы нашай нядзельнай школы завіталі ў ДУА “Гродзенскі інстытут развіцця адукацыі”, каб прыняць удзел у святочным мерапрыемстве з прыгожай назвай – паэтычны вернiсаж.
“Каб мiр на зямлi не парушыць”, “Нiколi не забудзем”, “I песнi, i вершы мы дорым у славу героям”, “Не магу я жыць без Беларусі!” – надзвычай выразна, светла, з непадробнай дзiцячай звонкасцю, шчырасцю, пяшчотай перад супрацоўнікамі інстытута і шаноўнымі гасцямі выступалі самыя юныя ўдзельнiкi паэтычнага вернiсажу: Рыкоўскi Мiхаiл, Болбат Марына, Барычэўскi Мiхаiл, Даўгаполiк Арсенiй.
Як сапраўдная малітва за мір ва ўсім свеце, лілася з сэрца і вуснаў шчырая паэзія. А на вялiкiм экране не пераставалi ўзнiкаць здымкi беларускiх пісьменнікаў, мастакоў, кампазiтараў, актораў – усiх, каму ў юным узросце выпала прайсці праз вернасць да Радзiмы i плённа папрацаваць дзеля Вялiкай Перамогi. Iх творы працягваюць жыць сёння i служыць жываноснай крынiцай нам, людзям, дзецям мiрнага часу. I мы iдзём да яе спаталiць духоўную смагу i з кожным глыбокім уздыхам прызнацца ў любовi нашай Беларусі, чыстай, светлай, моцнай, няскоранай, мудрай, такой адзінай і святой зямлі пад белымі буслінымі крыламі!
